امين الله زمريالی

نوميالی ليکوال: طط
ديجيتل کوونکي: خليل الله سروري، شمس الله آرين

د کندهار بل علمي او سياسي شخصيت؛ امين الله زمريالی د علي محمد خان زوی او د عطا محمد خان لمسی دئ. په (۱۲۷۳ل.) کال د کابل په ښار کي زېږېدلی دئ.
لومړنۍ زده کړي ئې په حبيبيه ښوونځي کي تر رشيديې پوري ختمي کړي دي. د دې زده کړو په جريان کي ئې له شخصي استادانو څخه د وخت مروج کتابونه هم لوستي دي.
لومړنۍ دنده ئې په (۱۲۹۰ل.) کال د پکتيا د ملک زاده ګانو په ښوونځي کي سرمعلمي وه. څلور کاله وروسته د شاهي غونډ سرکاتب وټاکل سو.
په (۱۳۰۰ل.) کال په ننګرهار کي د توپچي کنډک مشر سو. په (۱۳۰۲ل.) کال د شينوارو د نازيانو قوماندان وټاکل سو. په (۱۳۰۳ل.) کال په کابل کي د ارکان حرب د استخباراتو څانګي مدير او په (۱۳۰۴ل.) کال د دفاع وزارت د مامورينو په مديريت وټاکل سو.
په (۱۳۱۰ل.) کال په کابل کي د کابل ادبي انجمن له تاسيس سره سم ښاغلی زمريالی د دې انجمن غړی سو. په (۱۳۱۶ل.) کال د ادبياتو او حفظ آثار د څانګي مرستيال سو او په (۱۳۱۷ل.) کال د پښتو ټولني د پښتو ژبي مدير وټاکل سو.
په (۱۳۱۹ل.) کال د نجات ښوونځي د پښتو ښوونکی وو، په (۱۳۲۰ل.) کال د پښتو ټولني مرستيالي ورکړه سوه. په (۱۳۲۳ل.) کال د کابل په دارالمعلمين کي ښوونکی سو او د ادبياتو د فاکولتې د استاد دنده ئې هم اجرا کړې ده او په (۱۳۲۵ل.) کال تقاعد سوی دئ.
ښاغلي زمريالي تر خپلي ژبي برعلاوه په پاړسي، انګرېزي، اردو، روسي، سنسکريټ او فرانسوي ژبو هم پوهېدی.
د زمريالي ډېر آثار او ليکني په کابل کالنۍ او طلوع افغان اخبار کي خپاره سوي دي، چي ځيني په لاندي ډول دي:
۱- پښتو مرغلري.
۲- د اشعارو دېوان.
۳- پښتو متلونه.
۴- پښتو قرائت (د شپږم ټولګيو لپاره).
۵- پښتو کيلي.
۶- د يوې پښتنې ملي احساسات (۱۳۱۴ل.).
۷- پښتو څنګه وروزو؟ (۱۳۱۵ل.).
۸- د پښتو ژبي فيلالوجي او پخواني ادبيات (۱۳۱۶ل.).
۹- د پښتو ادبياتو ته يوه کتنه (۱۳۱۷.).
۱۰- پښتو ته يوه کتنه (۱۳۱۱ل.).
۱۱- پښتو (۱۳۱۲ل.).
۱۲- پښتو (۱۳۲۰.).
۱۳- شرح احوال و افکار خوشحال خان (۱۳۱۵ل.).
۱۴- پښتو و پښتو لوګها (۱۳۲۱ل.).
۱۵- يوه بله د اشعارو ټولګه.
دغه د پښتو خادم او د هيواد تکړه پوځي، په خپلو رسمي ماموريتونو کي څلور اعزازي نښانونه هم ګټلي، وروسته په (۱۳۶۱ل.) کال کښي وفات سوی دئ.